ترددت وترددت الا ان توقفت وسألتها وين رايحه بالجو المغبر هذا ؟؟؟ قالت بصوت هادئ خجول انا رايحه للشارع الثاني البيت اللي عنده سياره جمس حمرا، فقلت لها تفضلي اوصلج انتي والخادمه وكنت اقول لها وانا متردده لان ولا مره ركبت احد غريب من الشارع سيارتي لكن منظرها وهي تمشي بالشارع وكان الوقت ظهر والجو غبار والخادمه ماسكه العجوز اللي عمرها تجاوز ال60 عام ويمشون بالشارع؟!؟!؟ فقمت ووصلتها الى الشارع الثاني ونزلتها عند البيت اللي تبيه

وين العيال عنها؟؟ وين الأحفاد؟؟ ما في أحد يوصلها؟؟ قلوب قاسيه

قبل يومين تقول صديقتي انها كانت تمشي بالشارع ولا تشوف حرمه كبيره معاها اغراض واكياس جمعيه وتمشي بالشارع ، وقفت لها صديقتي   وقالت لها وين رايحه حجيه؟؟؟ تبين اوصلج؟ فرحت الحرمه وقبلت الدعوه وركبت السياره … وفي الطريق سألتها ؟ حجيه وين العيال عنج؟؟ ردت العجوز وصوتها يتقطع من الاحراج ، العيال كلهم رايحين الشاليه وماخذين الخدم، عطلتهم ويستانسون مساكين؟ قالت لي صديقتي والله اني بكيت يوم قالت لي جذي؟؟؟ شنو القلوب القاسيه اللي يتركون امهم بالسن هذا بالبيت بروحها؟؟ وفوق هذا رايحه الجمعيه بروحها تشتري اغراضها واحتياجاتها؟؟ وين العيال عنها؟؟ على الاقل اخلي معاها احد الخدم واحد الاحفاد اللي يعتمد عليه؟؟؟ لكن الظاهر الشاليه ووناستها اهم من مجابل الوالده …. قلوب قاسيه

ومن جهة ثانيه نشوف بعض الأهالي الله يساحهم يتركون عيالهم بسن صغيره جدا مع السايق بالسياره اما لتوصيلهم للمدرسه او الذهاب للجمعيه؟!؟!؟ يعني نشوف عند المدرسه بنت عمرها ما يتجاوز ال 10 سنوات تنزل من السياره بروحها وهي مع السايق؟؟ الى الدرجه هذي نثق بالسواق ونترك بناتنا معاهم؟؟ او انك تشوف طفل عمره ما يتجاوز ال 7 سنوات رايح الجمعيه مع السايق وبروحه بعد؟!؟!؟ ليش جذي؟؟ شنو المشكله اذا اخذت الولد ورحت انا بنفسي معاه الجمعيه… ولد وبروحه مع السايق رايحين الجمعيه الله يستر ؟!؟

والأغرب من هذا اني من فترة شهر كنت رايحه الجمعيه بالليل ومتأخر وكان معاي اختي وانا بالسياره انتظر خروج سياره من الموقف والا اشوف 3 أطفال اعمارهم لا تتجاوز ال 7 سنوات وكانوا ولدين وبنت طالعين من الجمعيه ورايحين مشي للبيت واللي يحتاجون يعبرون الشارع حتى يوصلون البيت؟!؟!؟

وين الاهل عن عيالهم؟؟؟وين الأهل عن الأمانه قبل لا تضيع ؟؟؟   قلوب قاسيه